Videos

غربة من دون كربة – مشاعر وأشواق مغترب في عيد الفطر


أحببت أن أشارك أحبابي و أصدقائي و خاصة المغتربين منهم تلك الخواطر التي تأتيني كل عيد..

صار لي 14 سنة بالغربة عن بلدي بعيد
و بدون أهلي و اصحابي إجاني أكتر من عيد
بعض هالاعياد كنت فيها وحداني ،
ماشي متل الشبح بين الناس اللي عم تتبادل التهاني
طبعا الناس كلها خير و بركة و أصالة
و الله بعت لي ناس صاروا متل الأهالي
لكن حبيت أبعت هالرسالة لكل غريب و مهجر
و لو كان عايش ببلده بس أموره عم تتسكر

يمكن يكون عندك كتير أسباب حتى ما تفرح بالعيد
حتى ما تروح على الصلاة و تلبس توب جديد
و تستحي أنك تطلب من مديرك إجازة من الدوام
أو تضلك بالتخت، تشد لحافك و تطفي الضو، و تنام
يمكن تكون دفنت أحبابك قبل رمضان على طول
يمكن تكون مديون، أو مكسور أو عايش بلا مدخول
يمكن تتطلع على صور أطفال جايعين في اليمن أو سوريا أو فلسطين
يمكن تقول لنفسك: كيف ممكن أفرح، و أنسى بورما و المسلمين بالصين

فيك تسكتني و توقف هالفيديو و تقول
خلليني بهمي و زعلي و وضعي اللي مش معقول
بس أنا أخوك، و واجبي أذكرك و أوصيك
و أطبطب على جرحك و ألمك و واسيك

لازم تفرح بالعيد لأنه ربنا بده ياك تفرح
لازم تفرح بالعيد لأن الصيام خلى روحانيتك تربح
لازم تفرح بالعيد لأنه بعد كل ليل في نهار
لازم تشارك فرحة العيد مع كل هالاطفال الصغار
لازم تنظر للعيد انه صفحة جديدة بكتاب حياتك
لازم تاخد القلم و تبدأ تكتب فيه انجازاتك
ما تخلي حدان يقول لك شو تكتب بهالصفحات
ما تخلي كلام الناس و فلسفاتهم يحددوا تعريفك للحياة
بيوم العيد أعطي ولد ما بتعرفه عيدية أو بوظة أو عصير
و ارسم ضحكته على وجهك و تذكر نفسك و أنت صغير
بيوم العيد صالح كل الناس اللي تخانقت معهم و سامح
والله الدنيا كلها ما بتسوى أن عليها نتناطح و نتدابح

بيوم العيد اعطي نفسك عيدية و عاهدها و حتى أعمالك الصالحة تزيد
بيوم العيد. البس جديدا و عش حميدا و بعد عمر طويل، ادعي أنك تموت شهيد

بيوم العيد ما تبعت معايدات جوفاء لكل الناس
سجل رسالة بصوتك و حط فيها مشاعر و احساس
شارك هالفيديو مع أناس ما عيدت معهم من زمان
و ادعيلهم و ادعيلي و ادعي لأمتنا كمان

Tags

Related Articles

One Comment

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Back to top button
%d bloggers like this: