Videos

من مغترب إلى أحرار لبنان: وجه بوصلتك – حطم أصنامك – وحد أصواتك #كلن_يعني_كلن


كلمة متواضعة إلى أحرار لبنان اللي أعادوا الأمل لكل مغترب أن الدنيا بعدها بخير

أهلي و حبايبي في لبنان
كان بودي كون معكم في ساحات التظاهر، و ضم صوتي لالاف الحناجر اللي عم تهتف بأبسط حقوق ممكن إنسان يطلبها
أو ساعدكم بلم الزبالة متل ما فرجيتو العالم كله كيف التظاهر الحضاري بكون
أو أحضن قوى الامن المخلصة اللي هي منا وفينا بس مرات ما طالع بإيدهم شي
كانت أمنيتي أنزل أصور كيف لما الشعب كله يتوحد – مسلم مسيحي – سني شيعي درزي حول راية واحدة . مش ح ننسى خلافاتنا الدينية و السياسية و الطائفية و مش ح نتفق على كل شي، لكن الامر البديهي و المطالب الأساسية لكل إنسان: كهرباء و ماء و هواء نظيف – طبابة و تعليم و مدارس لأولادنا

نصائح سريعة والله من قلب محروق:
1- ح يكون في اناس متسلقين ح يركبوا الموجة
2- ح يكون بالمقابل في اناس عم براهنوا أن هيدي فورة و ح تموت بعد شوي
3- ح يكون في حرب إشاعات و أخبار كاذبة هدفها تمييع التظاهر و تحويله عن هدفه
4- ح يكون التخيير بين النظام الطائفي الفاسد و بين الفوضى ، و ح يكون في منطق التخوين و اتهام أيدي أجنبية و طابور خامس
و كأنه النظام القائم هو وحده بمثل الوطن.

الله يخليكم يا أبطال:

أكبر سلاح ممكن تستعمله هو النفس الطويل، هيدا ماراتون طويل و مش لازم نستعجل النتائج.
لازم يكون في بعض التنظيم و التوحد تحت راية حدا نثق فيه و إلا ح يخطف المنظر الحضاري الرائع لهذه الثورة المندسين و المخربين و ح تعطوا الاعلام مادة سهلة لاجهاض التحرك متل ما عملوا من قبل
المعطيات كبيرة حتى يكون في تغيير: من قبل كان الاعلام على التلفزيون أو الصحف مراقب و مسيس و موجه، الان في فرصة لأي عمل إعلامي قوي ومحايد أن يكون الاعلام البديل

ضروري توجه غضبك و صوتك تجاه المفسدين و ما تحول بوصلتك عنهم أو تختار واحد دون التاني.
إبدا بابن طائفتك و منطقتك و خللي كل منطقة تهد أصنامها بإيدها.
إياك غضبك يأذي حدا بريء أو ما خصه و إياك غضبك يتسبب بتخريب بلدك و هواك اللي عم تتنفسه
طبعا مستحيل يكون في تغيير بقلب لبنان بدون عوامل خارجية لكن كمان الدول الخارجية كلها فايتة ب 600 حيط و في تخبط بينها و بسياساتها. خللي أملك بالله كبير و بعدين أملك بالانسانية اللي تجمعنا . جوا كل واحد منا بغض النظر عن الدين و المذهب و الانتماء السياسي و المناطقي – في جوا كل واحد منا إنسان ما بده شي من هالدنيا أكتر من حياة كريمة من دون ذل.

رسالة خاصة للناس المتعلمين اللي بسموا حالهم مثقفين و نخب
ناس بلا عقال راحوا قطايع
و ناس بلا جهال حقهم ضايع
ما في شي ممكن ينحل اذا ضليت بالبرج العاجي تبعك و انتقدت الفوضى و الخراب
اهلك و ناسك بدهم اياك تلتحم مع الناس مع الشعب
مع الحج و الحجة و مع التونت و العم و الخالة الي ما بيعرفوا يفكوا الحرف

الثورة يبدأها مغامر ويقودها ثائر ويحصد ثمارها جبان

Tags

Related Articles

5 Comments

  1. الله يبارك فيك يا مهنّد. جبتها بالصميم لما قلت "كل واحد يهد اصنامه". ان شاءالله هالجهود مكفّاية لتتحقق كل مطالب الشعب

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Back to top button
%d bloggers like this: